Ang Talaarawan ni Anne Frank
isinalin ni Homer Nievera

Si Anne Frank ay ipinanganak sa Frankfurt, Germany, sa isang pamilyang Hudyo noong ika-12 ng Hunyo taong 1929. Ang kanyang amang si Otto Frank ay isang respetadong negosyante. Si Anne at ang kanyang nakatatandang kapatid na si Margot ay lumaki sa isang maganda at mapagmahal na pamilya at mataas ang pinag-aralan.

Noong 1933, inilipat ni Otto Frank ang kanyang pamilya sa Holland dahil sa kalupitan ng mga Nazi sa mga gaya nilang Hudyo. Noong 1940, sinakop ng mga Aleman ang Holland at nasadlak ang mga Hudyo sa kalupitan ng mga Nazing Aleman. Noong una, hindi naramdaman ni Anne ang mga kalupitang ito, kundi lamang sa kinailangang umalis siya sa pinapasukang mataas na paaralan para sa mga Hudyo.

Naisip ni Otto Frank na maaaring paparating na ang kinatatakutang mga pangyayari kaya’t naghanda siya ng pagtataguan ng kanyang pamilya. Naglipat siya ng mga kagamitan ng unti-unti sa halos isang taon hanggang sa makatanggap ng sulat ang kanyang panganay na anak na si Margot na pinadadala na siya sa isang kulungang kampo kung saan maaari siyang ipapatay.

Noong ika-5 ng 1942, para bagang naglaho ang pamilyang Frank. Nagtago sila ng halos dalawang taon sa tinatawag na Secret Annexe, isang gusaling imbakan ng kanilang mga negosyo. Kinailangan nilang manahimik sa umaga para hindi sila madiskubre sa pinagtataguan. Mga kaibigan ang nagdadala ng mga pangangailangan nila kahit delikado ito.

Dito sa Secret Annexe isinulat ni Anne ang karamihan sa kanyang talaarawan, isang pulang kuwaderno na pinangalangan niyang Kitty. Isa itong regalo sa kanya noong ika-12 n Hunyo 1942 para sa kanyang ika-13 na kaarawan.

Doon sa talaarawan ni Anne niya isinulat ang lahat ng kaganapan sa panahon ng kanilang pagtatago hanggang sa sila ay mahuli. Nilagyan niya ito ng mga palamuti at litrato ng kanyang pamilya. Nagsulat din siya dito ng mga maikling kuwento na ninais niyang ipalimbag sa kanilang kasambahay.

Noong Agosto 4, 1944, ang Gestapo, o Nazi Secret Police, ay nakatunton sa mga Frank sa Secret Annexe, kasama ang iba pang hudyo. Dinala sila sa kampo ng Westerbork sa Drente, Holland para parusahan. Mula doon, dinala sila sa isang kampo sa Auschwitz, Poland. Si Otto Frank lamang ang nakaligtas ng buhay. Si Edith Frank ay namatay sa Auschwitz noong Enero 1945 samantalang sina Anne at Margot ay inilipat sa kampo sa Bergen-Belsen sa Alemanya noong Oktubre 1944. Doon, sandaling nagkita at nagkasama si Anne at ang kanyang kaeskuwela na si Lies Goosens. Namatay sina Margot at Anne ng dahil sa Tipus noong Marso 1945.

Bumalik sa Otto Frank sa Amsterdam noong 1945 matapos ang digmaan. Binigay ni Miep van Santen sa kanya ang mga nasalbang kuwaderno at aklat bago sila nahuli sa Secret Annexe.

Noong nalaman pala ni Anne na maaring ipalimbag ng Dutch War Cabinet ang mga talaarawan pagkatapos ng digmaan, inayos niya at in-edit ito. Inilipat niya sa mga malilinis na papel ang laman ng kanyang talaarawan at binalak na ipalimbag ito sa titulong Het Achterhuis, o ang ibig sabihin ay “Ang Likod-Bahay” na Secret Annexe ang ibig sabihin sa Ingles.

Ipinalimbag ni Otto Frank ang talaarawan ni Anne noong 1947. Mula noon, isinalin na ito sa mahigit 50 salita. Ang Montessori School kung saan siya nag-aral ay pinangalangang Anne Frank School. Ang Secret Annexe ay nakatayo pa rin kung saan libu-libong turista ang bumibisita dito taon-taon.