Kung Nais ng Diyos, Huwag Matakot

Lk. 5: 1-11 "Huwag kang matakot. Mula ngayo’y mamamalakaya ka ng mga tao."

Ano ang iyong reaksiyon kung si Hesus mismo ang magpapagawa sa iyo ng isang gawain? Hindi ba’t kaagad kang kikilos ng walang atubili?

Ito marahil ang naranasan ni Simon Pedro at ng kanyang mga kasama nang sila’y nangingisda buong gabi at walang mahuli sa Lawa ng Genesaret. Nagmamasid noon si Hesus sa kanilang ginagawa nang lumapit Siya sakay ng isang bangka at sabihing “Pumalaot kayo at ihulog ang mga lambat upang manghuli.” Para ko na ring narinig sina Simon Pedro na nagbubulungan ng “Eh ano naman kaya ang alam ni Hesus sa pangingisda kung Siya’y isang karpintero?” Ngunit sa pagkakataong ito sinunod nila si Hesus. At hindi naman sila binigo Nito nang halos masira ang lambat nila sa dami ng isda na kanilang nahuli.

Iyan ang malaking pagkakaiba kung si Hesus mismo ang nag-utos, Sunod agad tayo ng walang dalawang isip.

Sa ating buhay, lalo na sa pagsisilbi sa Diyos, importanteng kumonsulta muna sa Kanya bago gumawa ng mga bagay-bagay. Alam naman nating perpekto ang mga plano ng Diyos. Lahat ng Kanyang pangako, tinutupad Niya.

Kaya naman sa mga pagkakataong tayo’y nanghihina sa serbisyo sa Panginoon, dapat tandaan ang Kanyang mga salita, aral, utos at pangako. Hindi dapat matakot lalo na sa pagharap ng mga pagsubok sa buhay. Kung tayo’y nalilito at nangingimi sa ating pagsunod, tandaan lamang ang sinabi Niyang huwag matakot. Mas malaki ang Diyos kesa sa ating mga pagsubok. Siya ang kapitan ng ating buhay. Bakit tayo matatakot?

Kung masasabi nating nakilala na natin ng lubos ang Diyos, at tayo’y may personal na relasyon na sa Kanya, nararapat lang na ibahagi natin ito sa iba.

Iba’t-ibang talento ang mga ibinahagi sa atin ng Panginoon. Bawa’t isa sa atin ay may kanya-kanyang paraan kung paano maibabahagi ang Mabuting Balita ng Kaligtasan sa iba. Ito ang misyon natin. Hindi natin ito maikakaila.

Pagnilayan:
Anu-ano ang dahilan ng aking agam-agam o takot na maibahagi ko sa iba ang aking pananampalataya?

Dasal:
Panginoon, nawa’y mapalakas Niyo po ang aking pananampalataya nang maibahagi ko ang Inyong Mabuting Balita ng kaligtasan at buhay na walang hanggan. Amen.